اسلام آباد۔12مارچ(اے پی پی)وزیر اعظم عمران خان آکھیے جو حکومت دی کامیاب معاشی پالیسیاں نال ترکے اچ ملݨ آلی ݙیوالی معیشت کوں استحکام ملیے اتے قومی معیشت ہݨ پائیدار ودھوتری تے ویندی پئی اے۔ اے ڳالھ انہاں وفاقی وزیر بحری امور سید علی حیدر زیدی اتے پشاور، اسلام آباد، راولپنڈی اتے چکوال دے ارکان قومی اسمبلی اتے تریتمیں دیاں مخصوص نشستاں تے منتخب ارکان اسمبلی نال ملݨ ویلھے آکھی۔ انہاں آکھیا جو منتخب نمائندے عوام نال جڑت ودھاون، لوکاں کوں سماجی و اقتصادی ترقی کیتے جاری مختلف سرکاری اسکیماں بارے ودھ توں ودھ آگاہی ݙتی ونڄے جیندے اچ وݙے سماجی پروگرام اتے عوامی فلاحی منصوبے شامل ہین۔ انہاں آکھیا جو حکومت عالمی منڈیاں اچ لوڑھ دیاں شئیں دے مہانگ دے اثرات ڳھٹاوݨ کیتے سارے اقدامات کریندی پئی اے، حکومت انفارمیشن ٹیکنالوجی دےو دھارے اتے نینگراں کیتے روزگار دے مواقع ودھاوݨ کیتے کئی اقدامات کیتن۔ انہاں آئی ٹی کمپنیز، فری لانسرز کیتے 100 فیصد ٹیکس چھوٹ، 100 فیصد غیر ملکی کرنسی رکھݨ دی اجازت اتے آئی ٹی اسٹارٹ اپس اچ سرمایہ کاری کیتے کیپیٹل گین ٹیکس توں 100 فیصد دی چھوٹ شامل ہین، ڄݙاں جو کامیاب پاکستان پروگرام دے تحت آندے ݙو سال اچ کاروباری قرض تے407 ارب روپے دی سبسڈی ݙتی ویسی۔ وزیراعظم نال ملݨ آلیآں اچ پشاور توں شوکت علی، شیر علی ارباب، اسلام آباد توں راجہ خرم شہزاد نواز اتے علی نواز اعوان ڄݙاں جو راولپنڈی، چکوال توں راشد شفیق، منصور حیات خان اتے ذوالفقار علی خان سودھا تریمتیں دی مخصوص نشستاں تے منتخب ارکان قومی اسمبلی کنول شوزب، بیگم شاہین سیف اللہ طورو، نفیسہ عنایت اللہ خٹک اتے نورین فاروق ابراہیم شامل ہن۔ سابق رکن قومی اسمبلی چوہدری اشفاق، حاجی محمد یونس علی انصاری اتے سی ای او چین ون میاں کاشف اشفاق وی موجود ہن۔
.jpg)
