اسلام آباد۔28جنوری (اے پی پی):سینیٹ سٹیٹ بینک آف پاکستان (ترمیمی) ٻل 2022ء دی منظوری ݙے ݙٹی اے ، جمعے کوں سینیٹ اجلاس اچ وفاقی وزیر خزانہ شوکت ترین تحریک پیش کیتی جو سٹیٹ بینک آف پاکستان ایکٹ 1956ء اچ مزید ترمیم دا ٻل سٹیٹ بینک آف پاکستان (ترمیمی) ٻل 2022ء قومی اسمبلی دی منظور کیتی ڳئی صورت اچ غور کیتا ونڄے۔ چیئرمین تحریک تے رائے شماری کرائی تاں تحریک دے حق اتے مخالفت اچ 43، 43 ووٹ آئے جیں دے بعد چیئرمین سینیٹ آپݨا ووٹ تحریک دے حق اچ ݙتا جیں توں تحریک منظور کر ڳھدی ڳئی ۔ ایں موقع تے سینیٹر مشتاق احمد ٻل اچ آپݨی ترمیم پیش کیتی جیں کوں ایوان مسترد کرݙتا ، جیں دے بعد چیئرمین ٻل شق وار منظوری کیتے ایوان اچ پیش کیتے۔ اپوزیشن ٻل تے رائے شماری دا مطالبہ کیتا جیں تے ڳنتری کرائی ڳئی تاں ٻل دے حق اچ 43 اتے ٻل دی مخالفت اچ 42 ارکان ووٹ ݙتا جیں تے ٻل کثرت نال منظور کر ڳھدا ڳیا ۔
.jpg)
