مظفر آباد ۔ 13 ستمبر (اے پی پی) وزیراعظم عمران خان آکھیا جو مقبوضہ کشمیر اچ بھینڑیں،بھرا،بزرگ اتے بال چالہی ڈینھ توں محصور ہن،نریندر مودی جتنا مرضی ظلم کر گھنے کامیاب کائنا تھیسی،کشمیری عوام اچ موت دا خوف ختم تھی گئے ،بھارت کوں ڈساونڑ چاہنداں جو ساری دنیا اچ کشمیریاں دا سفیر بنڑ تے ویساں،اقوام متحدہ دی سلامتی کونسل نال خطاب اتے عالمی ذرائع ابلاغ اچ کشمیریاں دی آواز چیساں،کشمیر دا مسئلہ ہک واری ولا عالمی سطح تے اجاگر تھی گئے،پنجاہ سال بعد کشمیر سلامتی کونسل اچ بحث کیتی گئی اے،اقوام متحدہ دی انسانی حقوق کونسل مقبوضہ کشمیر دی صورتحال تے تشویش کیتی اے،او آئی سی اتے یورپی یونین بھارت توں کوں کرفیو ہٹاونڑ دا مطالبہ کیتے۔اے گالھیں انہاں جمعے کوں مقبوضہ کشمیر دی عوام نال یکجہتی سانگے تاریخی جلسہ عام نال خطاب کریندیں ہوئیں آکھی۔وزیراعظم عمران خان تاریخی استقبال تے آزاد کشمیر دی عوام دا شکریہ ادا کیتا اتے آکھیا جو انہاں پوری دنیا اچ کشمیر دا سفیر بنڑنڑ دا فیصلہ کیتے،کشمیر دا مسئلہ انسانیت دا مسئلہ اے۔انہاں آکھیا جو مقبوضہ کشمیر اچ بھینڑیں،بھرا،بزرگ اتے بال چالہی ڈینھ توں محصور ہن۔وزیراعظم عمران خان ڈو ٹوک انداز اچ آکھیا جو نریندرمودی میں تیکوں سنھیا ڈیونڑ چاہنداں جو توں ڈرپوک ایں،کیونجو صرف ہک ڈرپوک بندہ معصوم لوکاں تے ظلم کریندے،جئیں اچ انسانیت ہوندی اے او کڈاہیں ایجھا ظلم نی کریندا،دلیر انسان کڈاہیں تریمتیں اتے بالاں تے ظلم نی کریندا۔انہاں آکھیا جو نریندر مودی آر ایس ایس دا بچپن توں ممبر اے،آر ایس ایس دا نظریہ اے جو ہندوستان صرف ہندواں سانگے اے۔انہاں آکھیا جو آر ایس ایس ہٹلر دے نازی نظریے تے عمل کریندے،آر ایس اسی دے بانی ہٹلر اتے مسلونی کوں پسند کریندے ہن۔وزیراعظم آکھیا جو بھارت اچ وی اعتدال پسند روشن خیال لوک مودی نظریے دے خلاف ہن۔انہاں آکھیا جو کشمیر دا مسئلہ ہک واری ولا عالمی سطح تے اجاگر تھی گئے،پنجاہ سال بعد کشمیر سلامتی کونسل اچ بحث کیتی گئی اے۔، امریکہ اچ وی امریکی سینیٹرز صدر ڈونلڈ ٹرمپ توں مطالبہ کیتے جو مسئلہ کشمیر تے ثالثی سانگے کردار نبھاون۔وزیراعظم کشمیری نوجواناں کوں مخاطب کریندیں ہوئیں آکھیا جو میں تساڈے عزم تے حوصلے کوں سلام پیش کرینداں اتے میکوں پتہ اے جو لائن آف کنٹرول پار کرنڑ چاہندو پر میڈا مطالبہ اے جو تساں ایل او سی پار نی کرنڑی اتے میڈے آکھے دا انتظار کرنڑاں اے۔انہاں آکھیا جومیں اقوام متحدہ دی سلامتی کونسل اچ کشمیر دے مسئلے بارے عالمی رہنماﺅاں کوں ڈسیساں۔
.jpg)
